La 5-an de novembro 2022, Josip Pleadin prelegis pri la temo „Resume pri la Erasmus+ projekto Reta edukado nun” por membroj de Unuiĝo de Prelegantoj de Esperanto (UPE) en Zagrebo, en ĝia ejo en Radnički dol 1.
La projekcion vi povas vidi ĉi tie!
Kategorio: ERASMUS+
La kvina kunveno de Erasmus+ projekto en Glasgovo
Tri reprezentantoj de Dokumenta Esperanto-Centro el Đurđevac (Marija Jerković, Roberto Maglica kaj Josip Pleadin) restadis en la lasta kunveno de partneraj organizaĵoj de la Erasmus+ projekto „Reta edukado nun” komence de oktobro 2022 en Skotlando. Dum la kunveno estis pritraktitaj konkludoj pri la projekto, kiu komenciĝis fine de 2020 kaj okazadis en tre malfavoraj kondiĉoj de la koronvirusa pandemio. Post la kunvenoj en Đurđevac meze de 2021, Bjalistoko (Pollando) en decembro 2021, Tuluzo (Francio) en marto 2022 kaj Piani di Luzza (Italio) en aprilo 2022, okazis la fina kunveno en Glasgovo (Skotlando) inter la 30-a de septembro kaj 4-a de oktobro 2022, kiu samtempe estis la lasta en Britio post ĝia eliro el Eŭropa Unio. La projekton „Reta edukado nun” aprobis la pola Agentejo por movebleco kaj programoj de Eŭropa Unio. La kunordiganto de la projekto estis Bjalistoka Esperanto-Societo, kaj partneris Esperanto-kultur-centro el Tuluzo, Bunta Esperanto-Asocio el Bolonjo, Kosmo-strategio el Edinburgo kaj Dokumenta Esperanto-Centro el Đurđevac. Dum kvin partneraj kunvenoj estis pritraktitaj temoj pri arkivado, ciferecigo de presitaj materialoj, aŭtoraj rajtoj, hibridaj prelegoj, subtekstigo de filmoj, komuna eŭropa referenckadro por lingvoj kaj diversaj teknikaj postuloj por realigo de reta kaj distanca edukado.
La 4-a kunveno de Erasmus+ projekto en Piani di Luzza
Dum Pasko, inter la 15-a kaj 18-a de aprilo 2022, kvar reprezentantoj de DEC (Roberto
Maglica, Josip Pleadin, Ivanka kaj Zdravko Seleš) partoprenis la Internacian Junularan Festivalon en la vilaĝo Piani di Luzza en Dolomitoj (Italio), enkadre de kiu okazis ankaŭ la kvara kunveno de
la Erasmus+ projekto Reta edukado nun. La temo de la kunveno estis Hibrida edukado.
Enkondukajn prelegojn okazigis la 16-an de aprilo Francesco Maurelli pri la propraj spertoj rilate hibridan edukadon, Anjo pri Hibrida edukado en la ISC-universitato en Sussex kaj Olekandra Kovyazina, kiu parolis pri teknikaj kaj praktikaj detaloj de hibrida edukado, preparinte tiamniere la
partoprenantojn por grupa laboro. La partoprenantoj dividiĝis en kvar laborgrupojn, kiuj teame prilaboris la temojn pri: Instruado de lingvoj, Faciligo de diskutoj, Trejnado kaj Interaga prelego.
Ĉiu grupo devis prepari hibridan prelegon por partoprenantoj en la klasĉambro kaj virtuale pere de Zoom. La prezentaĵoj estis praktike montritaj la 17-an de aprilo. Samtage por la interesiĝantoj estis
organizita ankaŭ promocia prelego pri Erasmus+ projektoj kaj konsultiĝo de la partneraj organizaĵoj pri financaj kaj teknikaj temoj, speciale pri la kvin kunveno okazonta de la 30-a de septembro ĝis la
4-a de oktobro en Edinburgo (Skotlando).
La reprezentantoj de DEC eluzis la okazon ankaŭ por partopreni en la programo Trinko- manĝa nokto, okazinta la 16-an de aprilo, dum kiu ili prezentis la riĉan oferton de manĝaĵoj kajt trinkaĵoj el Kroatio.
2022 Erasmus+ Piani di Luzza - fotis Ivanka Seleš (15.-18. 04. 2022.):
2022 Erasmus+ projekt Toulouse - fotis Josip Pleadin (10.-14. 03. 2022.)
Renovigo de la memortabulo pri la gazeto Kroata eseprantisto en Zagrebo
Preparante Pasporton tra la Zamenhofaj Esperanto-Objektoj, estis konstatite, ke la
memortabulo pri la gazeto Kroata sperantisto, kiun en 1989 starigis Zagreba Esperanto-Ligo en Zagrebo ĉe la Placo de reĝo Tomislav 21, troviĝas en tre malbona stato. Pro tio DEC la 2-an de novembro 2021 skribe kontaktis la Urban instituton por protekto de monumentoj de kulturo kaj
naturo, klopodante trovi eblecojn por ĝia renovigo. La Urba instituto por protekto de monumentoj de kulturo kaj naturo respondis la 5-an de novembro kaj samtage al DEC telefonis la faka
konsilistino Ana Vranić Rob. La Instituto peris la postulon de DEC pri renovigo de la memortabulo la 12-an de novembro al la Urba oficejo por spaca prizorgo, konstruado de la Urbo, konstrulaboroj,
komunalaj aferoj kaj trafiko, kiu estas respondeca pri la laboroj de monumento-renovigoj. Post longa atendado, sinjorino Ana Vranić Rob la 21-an de marto 2022 telefone informis DEC-on, ke la memortabulo estas notita en la programo de renovigo, kaj ke ĝi estos restaŭrita dum estontaj monatoj per financoj de Urbo Zagrebo.
La 3-a kunveno de Erasmus+ projekto en Tuluzo
Inter la 10-a kaj 14-a de marto 2022, tri reprezentantoj de DEC (Roberto Maglica, Josip Pleadin kaj Zdravko Seleš) restadis en la tria kunveno de la Erasmus+ projekto Reta edukado nun,kiun gastigis Esperanto-Kultur-Centro de Tuluzo (Francio) enkadre de sia renkontiĝo SemEO (Semajno de Esperanto). Dum la 11-a de marto okazis enkonduka interaga prelego pri Ciferecaj
kompetentoj de Christophe Chazarein, kaj en la posttagmezaj horoj oni grupe laboris sub la gvido de Szabolcs Szilva. El inter multegaj ideoj por la praktika laboro estis elektitaj temoj Konsiloj por efika fukciado de retaj kunvenoj, Liberaj programaroj, La mondo de ciferecaj bildoj kaj Retaj
komunikaj platformoj. La temoj estis pritraktitaj grupe, prezentitaj per Zoom la 12-an de marto kaj publikigitaj en Jutubo. La retrokuplado pri la rezultoj de la kunveno okazis la 13-an de marto.
Reprezentantoj de DEC en Bjalistoko
Inter la 8-a kaj 13-a de decembro 2021, tri reprezentantoj de Dokumenta Esperanto-Centro restadis en la dua partnera kunveno de la Erasmus+ projekto „Reta edukado nun” en Bjalistoko en Pollando. La gastiganto de la kunveno estis Bjalistoka Esperanto-societo, kaj dum la kunveno, krom la antaŭviditaj diskutoj pri la projektaj temoj rilataj al la aŭtoraj rajtoj, okazis pluraj konsultiĝoj pri la projekto mem kaj pri la restaj tri kunvenoj, okazontaj en Tuluzo, Bolonjo kaj Edinburgo.
La partoprenantoj vizitis ankaŭ la programojn de la 22-aj Zamehofaj tagoj, dum kiuj estis festita la 30-a fondodatreveno de Esperanto-societo en Bjalistoko, kaj estis organizitaj vizitoj al famaj lokoj el la historio de Esperanto en la urbo mem kaj al la urbeto Supraśl. Kun partopreno de la urbestro kaj aliaj altaj funkciuloj de la urbo, estis florkronita la monumento de L. L. Zamenhof, la aŭtoro de Esperanto.
ERASMUS+ PROJEKTO “RETA EDUKADO NUN”
Erasmus+ projekto "Reta edukado nun" (Online Education Now) komenciĝis la 1-an de decembro 2020, kaj daŭros ĝis la 31-a de majo 2022. La projekton gvidas Bjalistoka Esperanto-Societo (Pollando), kaj partneras Bunta Esperanto-Asocio el Bolonjo (Italio), Esperanto-Kultur-Centro el Tuluzo (Francio), Kosmo-strategio el Edinburgo (Britio) kaj Dokumenta Esperanto-Centro el Đurđevac (Kroatio), en kies organizado en Đurđevac, inter la 12-a kaj 16-a de aŭgusto, okazis la unua ĉeesta projekta kunveno.
La kunveno okazis en la Ĉasista domo "Peski" kaj partoprenis ĝin dudeko da personoj el Britio, Pollando, Francio, Germanio, Hispanio, Nederando, Hungario, Italio kaj Kroatio, inter kiuj ankaŭ membroj de Bjelovara esperantista societo kiel gastoj. La partoprenantoj diskutis pri diversaj aspektoj de ciferecigo de bibliotekoj kaj arkivoj kaj pri la nuntempaj teknologiaj solvoj, kun aparta pritrakto de Esperantaj arkivoj en la mondo. La sidejon de la gastiganto, Dokumenta Esperanto-Centro, la nacia Esperanto-arkivo en Kroatio, la partoprenantoj vizitis dimanĉe, la 15-an de aŭgusto, kiam ili konatiĝis kun la statuso de la "tradicio de Esperanto en Kroatio" kiel nemateria kultura havaĵo kaj kun la labormaniero de ĉi tiu institucio.
En la labora parto de la kunveno okazis prelegoj de Sara Spanò pri funkciado de Erasmus+ projektoj, de Ana Manero pri la hispana Biblioteko Juan Régulo Pérez, de Francesco Maurelli pri la projekto mem, de Josip Pleadin pri grafikaj teknologioj, eldonado kaj arkivado, de Pascal Dubourg Glatigny pri la stato kaj defioj de Esperantaj arkivoj en la mondo, dum per zoom-kontakto la partoprenantoj sekvis la prelegon de Przemysław Wierzbowski el Pollando pri pretigo de ciferecaj eldonoj.
Ekster la labora parto, la partoprenantoj vizitis la bienon Barnagor de Božica Jelušić, koncerton de la muzikgrupo Psihomodo Pop sur la urba ĉefplaco, Malnovan urbon, la Muzeon de Urbo Đurđevac kaj la nove malfermitan Vizitcentron de Sablejo de Đurđevac.
En la fina kunsido, okazinta dum la posttagmezaj horoj la 15-an de aŭgusto, estis akceptitaj konkludoj pri la kunveno kaj anoncite, ke la sekva ĉeesta kunveno de la reprezentantoj de la partneraj organizaĵoj okazos meze de decembro ĉi-jare en Bjalistoko en Pollando. Marte 2022 la partoprenantojn gastigos Tuluzo en Francio, kaj maje 2022 Bolonjo en Italio, dum por la planita kunveno en Edinburgo en Skotlando ankoraŭ ne estas difinita dato.
La partoprenantoj de la kunveno organizite forvojaĝis el Đurđevac lunde, la 16-an de aŭgusto.
La organizantoj kaj partoprenintoj de la kunveno dankas al la teamo de la Ĉasista domo "Peski" kaj al la kompanio Hrvatske šume (Kroataj arbaroj) pro la escepte korekta kaj kvalita servado.
ERASMUS+ PROJEKT ”MREŽNO OBRAZOVANJE SADA” – SUSRET
Inter la 12-a kaj 16-a de aŭgusto 2021, Dokumenta Esperanto-Centro (DEC) el Đurđevac gastigos reprezentantojn de la partneraj organizaĵoj el Britio, Francio, Italio kaj Pollando, kiuj kune kun la DEC-anoj partoprenas en la Erasmus+ projekto “Reta edukado nun” (Online Education Now).
La kunordiganto de la projekto estas Bjalistoka Esperanto-Societo el Pollando kaj la partneraj organizaĵoj estas Bunta Esperanto Asocio el Bolonjo (Italio),
Kosmo strategio el Edinburgo (Britio), Centre Culturel Espéranto el Tuluzo (Francio) kaj Dokumenta Esperanto-Centro el Đurđevac.
Kvankam la projekto komenciĝis ankoraŭ en decembro 2020 kaj daŭros ĝis la fino de majo 2022, pro la epidemiologiaj kaŭzoj ĝis nun okazadis nur
retaj kunvenoj, kaj la partneroj por la unua fojo renkontiĝos en Đurđevac.
En la programo estos prelegoj pri Esperantaj arkivoj, arkivigado kaj cifirecigo de arkivaĵoj, kaj krome pri pretigo de retaj libroj kaj broŝuroj, diskuto pri la projekta temo kaj pri preparado de la sekva kunveno en Bjalistoko decembre 2021.
EO 
HR