{"id":1541,"date":"2024-06-06T06:15:52","date_gmt":"2024-06-06T06:15:52","guid":{"rendered":"https:\/\/novo.dec-kroatio.hr\/?p=629"},"modified":"2024-06-06T16:35:08","modified_gmt":"2024-06-06T16:35:08","slug":"esperantska-obiljezja-na-lopudu","status":"publish","type":"post","link":"https:\/\/novo.dec-kroatio.hr\/eo\/2024\/06\/06\/esperantska-obiljezja-na-lopudu\/","title":{"rendered":"Zamenhofaj Esperanto-Objektoj en Lopud"},"content":{"rendered":"

\t<\/span>En la pasintjare publikigita \u201ePasporto tra la Zamenhofaj Esperanto-Objektoj en Kroatio\u201d, kiun eldonis Bjelovara Esperantista Societo, oni mencias, ke sur Lopud, insulo en la elafita arkipelago apud Dubrovnik, ekzista du ZEOj. La ekzisto de Vilao Vesna kiel unu el tiuj estas dokumentita, kaj pri la ekzisto de la tombo de Milunka Ramljak ne ekzistis firmaj pruvoj, krom informo en la libreto \u201eLa paperoj de d-ro Ante Ramljak\u201d el la jaro 1973. Josip Pleadin en majo 2024 direkti\u011dis al tiu insulo, klopodante kredinde kontroli la informojn pri amba\u016d objektoj.<\/span><\/p>

\t<\/span>Surloke li konstatis ke amba\u016d objektoj vere ekzistas, efektive en sufi\u0109e neglektita kaj difektita stato, kaj en la interparoloj kun la lo\u011dantoj kaj heredintoj de la familio Ramljak, al kiu amba\u016d objektoj apartenis, li ekciis ankora\u016d iomete pli pri ilia historio.<\/span><\/p>

\t<\/span>La Vilao Vesna estis kosntruita por la beograda advokato Ivo Bari\u0107, kaj la nova informo estas, ke li estis la unua edzo de Milunka \u0110okovi\u0107, kiu post lia morto reedzini\u011dis al advokato Ante Ramljak kaj ekde tiam portis lian familian nomon. El tiuj faktoj oni ekscias, ke Ante Ramljak, cetere konata kiel advokato de malri\u0109uloj kaj politikaj kontra\u016duloj de la iama (malnov)jugoslavia re\u011dimo kaj homo kiun ne interesis materiaj aferoj, la Vilaon Vesna ne a\u0109etis, sed ricevis \u011din pro la edzi\u011do al Milunka \u0110okovi\u0107. Kiel pasia esperantisto, sur la barilo \u0109irka\u016danta la vilon, li konstruis grandan Esperantan sloganon el betonaj kaj \u015dtonaj literoj, videblaj el la marvasto. Tiu teksto estas priskribita en la \u201ePasporto tra la ZEOj en Kroatio\u201d, sed hodia\u016d \u011di estas en tre malbona stato kaj ekzistas dan\u011dero, ke per eventuala vendo de la vilao, povus okazi \u011dia kompleta forigo.<\/span><\/p>

\t<\/span>Milunka Ramljak estis nekuraceble malsana kaj en iu momento \u015di faris suicidon per pendumado. \u015cia edzo Ante Ramljak deziris enterigi \u015din en la loka tombejo en \u0160unj, sed nek la ekleziuloj nek lokaj lo\u011dantoj favoris tion, \u0109ar unuflanke temis pri sinmortigito kaj aliflanke pri kredanto de ortodoksa religio, do Milunka Ramljak devis esti entombigita ekster la tombeja barilo. Ante Ramljak vere sur la \u0109efa tabulo de la tombo \u0109izis Esperantan tekston (ne tri tekstojn, kiel oni opiniis anta\u016de, \u0109ar la aliaj du estas kroatlingvaj), kiu nuntempe estas en tre malbona stato, kaj anka\u016d la tombo mem aspektas neglektita, \u0109ar pri \u011di neniu zorgas akurate de post la 1970-aj jaroj. Tamen, la sorto deziris ke la tombejo en \u0160unj devis plivasti\u011di pro la lokaj bezonoj, kaj la tombo de Milunka Ramljak poste ektrovis sin en la tombejo mem, kaj \u0109irka\u016de estis konstruitaj novaj monumentoj. De la heredintoj de la familio Ramljak ni ricevis bu\u015dan konsenton pri eventuala riparado de la monumento de Milunka Ramljak.<\/span><\/p>\n\n\n\n